心妍影片 – 關心妍國際歌迷會

心妍影片

2016年7月26日【壹週刊】關心妍學定增奶手勢囡囡唔怕餓親任飲

等咗7年先播到種，關心妍生b之前已經做足功課，學定點增奶，確保囡囡出世唔怕餓親，因為媽媽是有練過的。

其實都唔做咁擔心，阿Jade喺大肚前，上圍已經唔錯，使乜驚。

辛苦都堅持餵人奶，好多星媽都係咁做。

官恩娜餵人奶受盡白眼，俾人投訴兼侮辱，不過為咗囝囝可以肥肥白易，少少流言蜚語算得係咩。

梁詠琪生咗Sofia寧願唔修身，都堅持餵人奶，如果出埠做嘢，就揼晒先走。

岑潔儀亦試過喺茶樓餵奶，俾女茶客歧視，大家都係女人，相煎何太急呢？

36歲的歌手關心妍（Jade）上周六誕下囡囡楊榮心（Jovia），她昨日公開一家三口的合照，大晒溫馨，又在社交網站甫囡囡的獨照，代囡囡向大家打招呼！雖然Jovia在相中未有張開眼睛，但其眼線修長，相信必定有一雙大眼睛。Jade透露囡囡出生時有6磅6，長48厘米，又指聽取朋友的意見後，決定會餵全母乳：「我依家得好少初乳，所以餵得比較頻密，一日10至12次，好彩我之前有去上堂，好快上手，BB又好乖，識搵食，大家好容易配合到。」

好快要剪髮
Jade表示要感謝大家的祝福，希望盡快能帶囡囡與大家見面，又笑指囡囡一出世時似自己，但過了兩日就似爸爸：「佢好多頭髮，我諗佢係最快要去剪頭髮嘅BB！」而剖腹產女的Jade獲老公楊長智陪入產房，她笑謂要頒獎給表現冷靜的老公：「開頭以為佢會好緊張，點知佢好冷靜，仲好勇敢咁剪埋臍帶，嗰刻好感動，有小小想流淚，好touching！」

關心妍晒一家三口幸福照，B女初生就已經長了濃密黑髮。

2016年7月25日TVB 娛樂新聞關心妍首發一家三口照片囡囡頭髮濃密樣子可愛

2016年7月25日蘋果日報（即時娛樂）【餵全母乳】初乳好緊要關心妍讚BB又好乖識搵食

36歲關心妍（Jade）前日為老公楊長智生咗小公主楊榮心（Jovia），初為人母嘅Jade為咗囡囡嘅健康堅持餵母乳，佢就話：「o依家因為好多人話初乳好緊要，我問咗好多人意見，堅持會餵全母乳，但開頭因為o依家好少初乳，餵嘅時候好頻密，要十至十二次，好在之前有上堂，埋手已經好ok，BB又好乖識搵食，好容易大家配合到，暫時呢個moment都非常之好，佢都食咗好多，餵母乳感覺好amazing。」

最後，Jade話好多謝大家祝福：「希望BB快啲同大家見面，佢出世時似我多啲，過一兩日後，佢o依家似daddy，好多頭髮好得意，我諗佢係最快嘅BB要剪頭髮。」

2016年7月25日【壹週刊】剖腹誕6磅6女》取名楊榮心關心妍日餵12次奶

同老公結婚多年嘅關心妍，啱啱誕下6磅6囡囡，剖腹產女嘅佢，心情靚爆。佢話個傷口雖然仲有啲痛，但一望到個女，就乜都抵番晒啦。
佢話︰「BB個名叫楊榮心，我哋跟族譜的榮字改，想佢有榮躍神嘅心。英文名叫Jovia，代表開心……希望佢成日都好喜樂。」做父母嘅梗係想BB開開心心。
關心妍依家餵人奶，佢話BB好大食，好彩佢都夠奶水，一日要餵成十至十二次，唔係個個媽咪做得到。佢仲話會堅持餵落去，母愛真偉大。
佢大讚老公勇敢，拍攝生產個程時冇手震，仲親力剪臍帶，令佢感動到眼濕濕喎！又話個女剛出世時似佢，但望望吓又似老竇，佢形容生仔係人生美妙過程，樂做媽咪嘅佢，依家有女萬事足，應該有排都唔會復出。

2016年7月25日蘋果日報（即時娛樂）【終於有樣睇】關心妍囡囡晒可愛O嘴爸爸楊長智親手剪臍帶

36歲關心妍（Jade）前日為老公楊長智誕下小公主楊榮心（Jovia），母女平安，小公主眼型好長，應該係大眼女，佢打呵欠時仲擘到嘴仔好大，O型嘴好可愛。

初為人母嘅Jade今日接受訪問，佢好開心話：「BB中文名叫楊榮心，我哋跟族譜改，因為榮字，代表榮耀同有神嘅心，所以叫楊榮心，英文名大家都想用番J字，所以叫Jovia，代表joyful、開心，希望佢係一個喜樂bb，佢出世6磅6，身長48cm，大約19吋左右，生產過程我係剖腹產女，一切都ok，之後有少少痛，都頂到，比我想像中冇咁痛。」

Jade話老公楊長智有陪佢入產房：「我諗住佢會唔會好緊張，因為佢係緊張大師，都驚佢入到產房手忙腳亂，佢只係攞部電話入去影相同拍video，點知佢出嚟嘅時候異常冷靜，我真係要頒個獎畀佢，冇諗過佢係可以咁冷靜，仲可以剪埋臍帶，雖然我瞓咗喺度，但感筧有少少流淚，呢個時候感覺好touching。」