【on.cc東網專訊】 求B成功的關心妍（Jade）現已懷胎五個月，她指懷孕後老公楊長智變成緊張大師，嚴禁她出席公開活動，但日前就見Jade和老公在尖沙咀商場的餐廳撐枱腳。醫肚後兩公婆離開餐廳，期間見Jade肚凸凸，平時愛穿三、四吋高跟鞋的她都改穿矮踭鞋，並全程翹實老公臂彎。
經過嬰兒用品店時，這對準父母即被門口的BB床吸引，據知這個BB品牌來頭甚勁，連英國皇室都選用，而店員即為兩人講解BB床，楊長智細心聆聽，又拉開床下的櫃桶研究，睇了十多分鐘，就扑槌買下該床。Jade則轉往睇BB車，一直恨生女的Jade，又拿住熊啤啤及洋娃娃來玩，購物後兩公婆繼續在商場行逛，之後就離開。
未出世都錫定BB先！
依跠，佢哋咪楊長智關心妍兩夫婦？
原來係出嚟買嘢畀BB。
研究咗一陣。
唔講咁多，買！
睇埋BB車。
兩公婆好熱心不停問店員問題。
關心妍心情仲好似勁靚，拎起公仔食咁玩。
懷孕五個月的關心妍（Jade）昨日到電台宣傳，Jade坦言月底才知BB性別。少少聲沙的她又稱：「因為賀爾蒙變o左，長期處於鼻敏感同感冒，其實係冇事。」並大讚BB乖兼開始踢其肚皮。問她會否影大肚相？Jade說：「想影，要睇老公肯唔肯，佢唔習慣影相會面紅。」更透露有意再追多個：「頂多生兩個，肯o黎就最好啦，如果冇，一個都開心。」有指她聘請楊千嬅的陪月，Jade說：「唔知，係呢行人介紹，會請兩至三個月，我同老公都要學湊BB。」
關心妍有意生完再追多個。
主持： 謝茜嘉
主持： 樂樂 阮兆祥
關心妍終於得償所願造人成功，梗係開心啦。至於生仔定生女嘅問題，佢就話同老公意見一致想生女，因為女仔聽話顧家啲喎，而且以後再生，感覺家姐會識睇住細佬多啲。愈講愈興奮，不過佢話陀B令到佢有嚴重偏頭痛所以日前Jade孖住老公去中環睇中醫。
「一起身就痛醒，一路都解決唔到，西醫淨係俾到止痛藥，但食得多都會影響BB，然後有啲朋友建議我睇中醫。其實開頭我老公都唔想我睇中醫，因為我前幾年想要BB都試過睇中醫，搞到太過補，補到個心有事。」關心妍話。
個心有事？咪就係心律不正囉，因為早幾年時不時都見Jade買補品、花膠補身，又飲埋唔少中藥進補，結果弄巧成拙，睇咗成年心臟科先好返，難怪老公反對佢再睇中醫！「咁我就勸老公不如俾我試吓，因為我個頭真係好痛，好似俾把刀插住咁痛，所以我話不如睇一睇啦，睇吓個中醫講咩，講得合理咪試吓食啲藥囉，如果可以解決到，又唔會影響BB。」
最後發現，原來Jade大肚後體質變咗，又飲薑水、紅棗水搞到肝火盛唔夠血，先會谷到頭痛，依家食咗啲中藥調理返，無咩大礙。
關心妍同老公楊長智結婚7年造人造足7年，今年二月公開攬馬騮公仔嘅相，宣佈陀猴B，終於證實造人成功。
數吓手指，原來Jade依家陀咗5個月，仲話隻馬騮B會係7月出世所以，老公搵咗楊千嬅當年生Torres嘅陪月俾老婆，據知好難book架，就算預早約都未必夾到檔期，真係爭崩頭，勁渴市！難怪Jade話：「好難搵呀，我都覺得好幸運，好多謝啲藝人朋友好好咁介紹俾我，啲陪月好難book架，點知陪月姐姐七月尾完上一個job，夾到我7月中或尾生，可以接手我個project，咁我就放心晒喇。」
聽聞一個好嘅陪月要成5萬一個月喎，勁貴囉！「係呀都好貴呀，但呢啲錢唔慳得，幾萬蚊我諗依家係標準價喇！咁所以我嗰個都好好，無獅子開大口，我都要佢陪廿四小時，頭幾個月要佢幫手，我亦會學，之後自己湊返。」Jade話。
仲有4個月就迎接新生命，時間話長唔長，阿Jade諗好餵母乳定奶粉未呀？「奶粉都有人sponsor，都有兩個選擇，到時睇情況，餵到就盡量餵，都要睇吓身體狀況，同埋可唔可以餵到咁耐。」
原來Jade係驚自己唔夠奶水，放心喎，佢上圍本身都唔係ipad，而且依家都谷得幾犀利。「係呀都好犀利，原來係咁厲害，我都希望佢可以停一停，因為我無衫可以著，我依家先明白驕人身材係點樣。」
【on.cc東網專訊】 已懷孕五個月的關心妍（Jade）腳踏貌似四吋的高踭鞋出席活動，十分震撼！談及這對高踭鞋，她解釋：「你睇佢好似4吋咁，其實得兩吋，同埋對我嚟講都唔係高踭鞋嚟，平時着開個啲5至6吋，呢對係可以出街嘅，而且只係着一陣，我依家着平底鞋好似唔識行咁。」她又笑言着高踭鞋要先同家人申請，為免他們擔心，並答應只着半個鐘。
消毒用品跟身
Jade又表示老公經常叫她小心身體，出入隨身帶備空氣清新機和消毒用品：「因為呢排流感好勁，我好多朋友都病咗，我自己抵抗力都唔係咁好，病咗又冇藥食，好麻煩。」她又表示原定今個月出新歌，所以今個月會繼續做宣傳，之後就會閉關休養，等候BB出世。
BB改名跟足族譜
談到BB的性別，Jade表示要等月底才揭曉：「大家都估係女仔，我都希望係女仔。（買定BB用品？）未知，唔敢買住，都好多公司贊助，慳好多之餘又環保啲。」談及為BB改名，Jade強調會跟族譜：「有個『榮』字，都輕鬆已經有一個字喺度。」Jade又笑說BB現在時不時會踢自己，早前去睇陳慧嫻演唱會，BB到夜晚仍沒有「收腳」，笑言是BB未試過聽到如此厲害的音樂。
胎教做個善良人
另外，Jade表示今日以慈善之星的身份出席活動，直言可以帶住BB一齊出席覺得好開心：「我初初懷孕嗰時都仲有去學校同學生分享，一講就個半鐘，但我對住青年人都扮冇事，希望今日帶住佢嚟參與活動，會影響到佢第日會做一個善良、會幫助別人嘅小朋友。」
貪靚關心妍穿上一對扮四吋的兩吋高踭鞋出席活動，十分震撼！
關心妍坦言着高踭鞋要先得到家人的批准。
關心妍強調這對是扮四吋、其實只得兩吋的高踭鞋。
早前宣布有喜的歌手關心妍（Jade）昨日為新歌《空心人》拍MV，更特別帶備消毒機到拍攝場地。因佗B令身材急速「升Cup」，Jade不禁自誇「好震撼，好澎湃」，透露下個月便得悉BB性別，預產期好有可能於她七月的生日周出世。
Jade懷有身孕後首度公開露面，為新歌拍MV，因在廢置廠房內拍攝，Jade特別帶備消毒機在身邊，Jade為保身子而穿上黑色大長褸及波鞋，明顯肚凸凸的Jade表示已懷孕四個多月，初期都有又嘔又暈，現在都沒有了，所以BB都好乖好錫媽媽。
老公鍾意女
講到BB性別，Jade謂：「下個月就知喇，我同老公都鍾意女，而公司同事都有開盤估我生仔定生女。」問她上圍是否明顯升Cup？Jade笑言：「一生人未見過咁震撼嘅畫面，冇諗過幾個月已經咁澎湃，未試過咁形容自己，都未到一半時間，遲啲唔知點算。」Jade承認初期都有狂食，一個月已肥了10磅，現已減少亂吃及多注重營養食物。Jade笑指身邊的朋友都變了「懷孕警察」，不時提她這個不能吃，那個又不能做，現除工作外已足不出戶。
仲未有床位
Jade又表示老公現在已好緊張，對於是否自然分娩？Jade稱很大機會在她生日周出世，但如果擇日開刀就要早少少，她大呼：「最緊要Book到醫院床位先，仲未有。」而Jade一向有養狗，問她可有因有BB棄養？Jade即言：「冇呀，不過細嗰隻呷醋，初頭係咁喺梳化同枱底屙尿，我後尾同佢講媽咪有咗BB，又畀佢伏喺我肚度，之後佢就冇嘢，所以狗係好有靈性。」
文：音樂組
懷孕四個多月的關心妍表示鍾意B女，而下個月就會知道ＢＢ的性別。
關心妍由工作人員扶着到場，並帶備消毒機（小圖）。
關心妍現在已沒有孕吐，可以投入拍攝MV。
歌手關心妍（Jade）宣布有B後，昨日首度公開現身，到荒廢的廠房為新歌《空心人》拍MV，Jade隨身帶備消毒機，並披上厚長褸保暖，內裏穿上輕紗裙的她明顯肚凸凸兼上圍「升Cup」，對此她笑說：「一生人未見過咁震撼嘅畫面，冇諗過幾個月已經咁澎湃，未試過咁形容自己。」Jade稱下周便知道BB性別，預產期在她7月的生日周，未定自然分娩抑或剖腹：「但最緊要嘅床位都未Book到呀！」Jade稱懷孕初期不斷狂食，一個月已重了10磅。問到老公是否很緊張？Jade說：「佢本身係緊張嘅人，所以更緊張。」
懷胎四月的Jade全程着大褸保暖，果然做足準備！
