關心妍（Jade）早前與藝人洪欣、李彩華及陳明恩飛往北京出席「天下華人同心築夢」活動，齊為內地殘疾兒童籌款。Jade獻聲後即到後台與殘疾兒童合照及傾談，了解他們所需，其後她逗留北京數天品嘗地道美食，放鬆心情，準備啟程往加拿大探親兼「造人」。
向奶奶「交人」
與老公相愛九年的Jade一直渴望生B：「今次去加拿大主要係『交人』，因為成半年冇見老爺、奶奶，咁啱我媽咪同哥哥又喺加拿大，咪同唱片公司請咗半個月假，去陪吓長輩享受家庭樂。」問到可會趁機造人？她說：「一定會啦！加拿大空氣同環境都好好，我都想兩個人去，三個人返囉！」
Jade對懷孕早已做足準備，奈何生BB是天意，加上她多年來偏瘦及身體弱，故婚後都要積極補身。
平價貨一樣得
以往常吃貴價補品的Jade，近年發現一些平價補品都可媲美頂級藥材，更以專家口脗表示：「咪以為幾萬蚊一両血燕、冬蟲草一定好，其實要視乎體質，聽我中醫講，我食幾十蚊一包嘅去核紅棗就可以養到血，煲水飲就得，我食其他貴價嘢反而唔啱添！」
問到可有準備補品給老公？Jade就大力推介秘魯人參「馬卡」，具補腎及增強體力之用：「好平，百幾至幾百蚊都有，煲湯、沖水飲都得，我老公依家日日飲。」
關心妍大方分享廉價補身助孕法，實在是求B者的福音！
洪欣（左起）、關心妍、李彩華及陳明恩結伴到北京行善。
與老公享受二人世界的關心妍，都希望早日生B。
