【on.cc東網專訊】 36歲歌手關心妍（Jade）人人都叫佢關家姐，但依家要改口叫關媽咪喇！因為結婚踏入第7年嘅佢終於都造人成功喇！佢喺微博報喜：「很想很想和大家分享這份喜悅。感謝主！ 新一年，家裡（裏）多了一位小成員呢！」佢仲上載咗張同老公楊長智齊齊拎住猴子公仔嘅相，張相仲寫住：「Monkey baby coming soon!!!!」恭喜晒呀！
守佗B秘密辛苦
Jade於2009年下嫁金融才俊楊長智後一直努力造人，過去多年多次「食詐糊」，Jade接受《東網》訪問時全程哈哈大笑，她說：「依家有咗三個半月，開始肚凸凸同緊張，預產期係七月尾。（人工受孕？）唔係。（順產？）未諗，生到會順產，睇到時情況，係一個好大課題。」Jade承認守住佗B秘密非常辛苦，她說：「頭一、兩個月佗得好辛苦嘔得好犀利，當時接咗好多Job唔推得，不停同公司講腸胃炎。」
想先女後仔
Jade透露睇醫生時老公一直陪伴在旁，她說：「知道有咗都好開心，因為試過好多次失望同食詐糊，知道後都唔敢同屋企人講，想穩定啲到三個月先講。（媽咪都唔知？）唔知，加上佢去美國，佢都係三個月先知。」問到「楊B」是否Made In HK？Jade大笑說：「應該係，因為去年十月做完澳門演唱會就開始努力。（老公有咩獎勵？）唔使啦，我應該幫佢生BB。」由於楊長智是獨子，問到是否想生仔？Jade說：「唔係，我同老公都想生女，生完女再生仔，有家姐照顧。」
佗B唔會做大帝
問到工作會否叫停？Jade說：「醫生話頭三個月最辛苦，依家可以做啲舒服嘢。（胃口大轉變？）好鍾意食嘅嘢變成唔鍾意食，好似好鍾意飲咖啡，依家聞到都想嘔，順手可以戒埋。」記者笑指可以做大帝狂點老公，Jade說：「唔會，我照做嘢，都會煮飯。」並透露身邊有不少「懷孕警察」朋友，Jade說：「已經講好多禁忌我聽。」
關家姐變關媽咪喇！
睇吓心妍同老公笑得幾開心！
拎住猴子公仔。
佗B嘅心妍明顯升CUP！
心妍同老公好恩愛呀～
