36歲關心妍（Jade），09年結婚後一直與老公楊長智二人世界。幾年前已放聲氣想做媽媽的她，開始同丈夫積極造人，惜兩年來肚皮唔爭氣，原來血虛的她較難成孕，其後友人提議Jade隔日飲紅、南棗水補身，體質明顯有改善，再加上浸腳穿襪等暖身秘方，令「身體暖，子宮會暖，加速有孕機會。」年幾後終於成功造人，現陀B三個半月的準媽媽Jade重了七磅，腹部微隆，已減少工作，更成家中皇后，她說：「老公和奶奶唔畀我再着高跟鞋，前兩日我話想食雞蛋仔，丈夫專程撲半個鐘買畀我，到4月前停工待產。」
採訪：方騫平 協力 : 林書鉉 攝影：李維隆 化妝：Cyrus Lee
髮型：Angus @ hip hair Culture 服裝：Germain 場地：木+木IDG Concept@塘尾道福強工業大廈A座306室
年半前，關心妍以獨門暖身法調理身體逾一年後，加埋學茶道，飲熟普洱此類正氣茶有助健康又可以暖身，終於成功造猴B。她說：「年半前開始全面戒凍飲，每日飲用紅、南棗水及晚上用熱水浸腳，健康開始有改善，效果比之前飲補身中藥仲好啲，中藥反而飲到我心跳加速，依家好感恩陀B三個半月，生個猴BB加埋肖虎嘅老公一定恰死我呢隻羊媽媽！」
4月停工待產
農曆新年前公告喜訊的Jade，昨日接受本報電話訪問時難掩喜悅，笑個不停，她說：「之前食過幾次『詐胡』，檢孕棒測到有BB，到睇醫生又無，所以呢次疑似有喜個半月去檢查，真係照到有BB，嗰刻開心到難以形容，眼有淚光不停咁笑。其實自去年十月澳門個唱後，我就密謀造人，點知真係中咗，呢個真正係『made in hong kong』好驕傲！好難頂係啱啱有喜時，撞正頒獎禮、除夕元旦騷等，頭兩個月陀B一聞到生果味就嘔，連平日最愛的咖啡奶茶都唔想飲，開始轉食甜、酸和辣嘢，雖然食辣嘢唔好，但食辣先有胃口。有幾次做嘢時嘔，我都只可以話係『腸胃炎』，唔敢公開住，踏入第三個月才無嘔。(幾時停工？)等農曆年後，宣傳埋首新歌，大約陀B五個月就全面停工，預產期係七月尾，會在香港生，不過開刀定自然分娩就未定。」
昨日宣佈快將做媽媽的關心妍，陀B三個半月，重了7磅，腹部微隆的她被丈夫恩愛拖到實。
胃口大逆轉的關心妍，平曰最愛食生果，飲咖啡奶茶，但陀B後居然全部唔like，只嗜甜酸辣。
昨日(3日)，關心妍攬猴公仔在個人網誌公告喜訊，「新一年，家裏多了一位小成員呢！」
■歌手要長期Keep Fit，開Show更要極速減肥其實好傷身，所以Jade之前都花了一段長時間食中藥調理身體。
老師Tommy指導關心妍拎茶壺手勢，最忌勾起手指尾。
兩周前，陀B三個月的Jade接受本報訪問時，雖然未宣佈喜訊，但就全程笑笑口，難掩喜悅。
Jade端坐椅子中央，雙腿貼實，上身挺直，雙肩放鬆，頭面向正面，面部表情自然才符合茶道儀態的要求。
暖身法助懷孕
關心妍透露坊間所有生仔秘方都參考過，但得出嘅結論係暖身尤其重要，遂開始日日飲紅、南棗水，加睡前浸腳、穿襪等三部曲，終於成功懷孕。
步驟1. 6粒去核紅棗煲十分鐘後放入暖壺焗半小時，當水飲。因紅棗太燥，隔日改煲南棗水，方法一樣。
步驟2. 睡前，開水浸腳，加入一小瓶蓋燒酒入熱水，浸十五分鐘。
步驟3. 每晚穿襪瞓，暖身。
紅棗水
