懷孕半月嘅關心妍（Jade）早前透露醫生指B女手長腳長，頭都好大，預產期係7月中，屆時會選擇剖腹生B，由於老公楊長智怕血，所以未知老公會唔會陪佢入產房。
小公主嘅來臨，Jade好友兼已為人母嘅梁詠琪(GiGi)都好期待，今日Jade喺微博上載GiGi探佢嘅相，見到GiGi輕摸Jade肚，Jade留言話：「謝謝Gigi來探我為我打打氣，B女好幸福又收到靚衫禮物！Thank u so much Gigi！」
GiGi接受本報訪問，講到去探大肚關心妍，佢話:「恭喜佢！佢狀態好好呀！有叫佢放鬆心情，唔使緊張。同佢分享好多生產嘅過程同埋要注意嘅嘢，同埋鼓勵佢餵母乳，有咩唔明，隨時可以問我。」
關心妍接受訪話：「GiGi嚟咗探我，好有心呀!因為我都唔會周圍出街，所以佢哋嚟到探我，又買咗啲嘢畀BB女。我哋都係傾吓偈，問佢攞啲心得，做媽媽要準備嘅嘢，大家可以傾下，因為我自己就冇呢個經驗，GiGi亦係好媽咪，佢教咗我好多嘢，好開心。我隻狗仔Butter小姐又好鍾意GiGi，對佢依依不捨，出奇地黐佢，好多人佢都唔跟，佢應該係鍾意靚女，好識揀。」關心妍又話好開心仲有差唔多唔夠兩個月就生，大家好期待見到BB出世。
