心心生日快樂。 今天係心心一歲生日， 妍迷祝心心身體健康， 快高長大， 幸福平安❤❤
Photo by 陸兆明
Daily Archives: 2017-07-23
2017年7月23日 星島日報 飛沖繩度假 關心妍慶祝囡囡1歲生日：喜極而泣
星島日報報道】關心妍去年7月誕下囡囡楊榮心（Jovia），追B追足多年終於成功，當然視Jovia為掌上明珠。近日關心妍一家三口到沖繩過暑假，享受陽光玩玩水，順道慶祝囡囡1歲生日。
關心妍同Jovia著上母女裝長裙，齊齊切生日蛋糕，精靈可愛的Jovia笑得好甜，又咬住手仔影相，萌爆。見囡囡快高長大，關心妍感言：「1歲生日快樂！今朝攬住你媽咪喜極而泣因為你轉眼一歲。感謝主賜這可愛小天使給我！ ＃mummylovesyou ＃godbless ＃就地取材自己佈置花backdrop」
Jovia好可愛
2017年7月23日 on.cc東網 囡囡1歲生日！關心妍開心到喊：感謝主
歌手關心妍（Jade）自從去年七月生咗囡囡楊榮心之後，周不時會喺社交網站上載囡囡嘅萌照，紀錄低心心嘅成長過程。
話咁快就已經一年，之前心心嘅契媽周雪芳就同心心預祝咗1歲生日，而今日就係心心嘅正日生日，Jade就喺社交網站上載咗佢哋一家三口嘅合照。身穿彩色長裙嘅心心，咬住自己嘅手指，好乖咁畀媽咪抱住，而且仲眼定定望住鏡頭，認真可愛！
Jade留言：「Happy birthday #joviayang 1歲生日快樂！今朝攬住你媽咪喜極而泣因為你轉眼一歲。感謝主賜這可愛小天使給我！ #mummylovesyou #godbless #沖繩 #uzaterracebeachclubvillas #就地取材自己佈置花backdrop @yangjonas」見到囡囡開開心心咁成長，真係為人父母嘅先知道呢份開心同感動。
去旅行慶祝
而Jade亦透露佢同老公帶埋囡囡到日本沖繩慶祝生日，Jade越洋接受東網訪問指：「特別帶囡囡去旅行，上飛機時都有擔心，因為佢係第一次坐飛機，好多父母都驚BB上機、落機啲氣壓問題。而我就特登畀佢飲奶，好感恩佢飲咗奶好快就瞓咗9個字，喺飛行途中都OK，到準備落機時我又畀奶佢飲、畀啲嘢佢玩，佢都冇扭計、冇喊。」
到咗沖繩後，Jade本來諗住帶囡囡去沙灘，點知沖繩太熱，去到夜晚7、8點先日落，因為太陽好猛嘅關係，所以Jade最後都冇帶佢去沙灘，佢話：「帶佢出去有啲難度，因為驚佢曬親，最後只好帶佢去泳池游水，但佢都好開心，見到每樣嘢佢都係咁叫，好多嘢佢都未見過，見到佢咁嘅樣，自己都好開心。」
Jade笑言預備咗好多浮床同囡囡玩，本來想拎去沙灘，最後拎晒落泳池同佢玩，好彩心心都玩得好開心，Jade表示：「佢一樣咁開心，囡囡喺香港都練過一陣水先過嚟，所以佢嚟到喺泳池游水都習慣。」
生日快樂呀心心。
關心妍仲開心到喊添。
見到BB健康咁長大其實係最好嘅禮物。
心心白雪雪似足媽媽。
關心妍IG
佢哋一家人仲去咗旅行！
囡囡好Cute cute呀。
仲有玩水嘅相添！
2017年7月23日 蘋果日報 (即時娛樂) 【摘鮮花佈置場地】囡囡1歲生日 關心妍全家飛沖繩慶祝
人妻關心妍（Jade）自從做咗媽媽後，一直停工專心湊寶貝囡楊榮心（Jovia），今日係心心嘅一歲快樂生日，Jade喺社交網貼抱囡食蛋糕相，感性留言：「Happy birthday #joviayang 1歲生日快樂！今朝攬住你媽咪喜極而泣因為你轉眼一歲。感謝主賜這可愛。」
原來Jade夫婦帶囡囡去咗沖繩慶祝，佢接受《蘋果》電話訪問表示：「好開心亦好感恩，心心轉眼一歲啦，我哋同咗佢嚟咗沖繩，仲有老爺奶奶一齊，大家同佢過第一次生日，想帶佢去第一次嘅旅行，畀我哋有回憶。」為咗佈置心肝寶貝嘅生日會，Jade笑言自己做咗採花賊：「我自己佈置咗backdrop畀佢，因為呢度冇特別汽球，我喺出面做採花賊，摘咗啲花佈置花花backdrop，預備咗蛋糕同佢切，所以都好開心。」
等足7年嘅Jade，去年今日終於成功生女，難怪心情特別激動：「今日攬住佢，知道佢一歲，我已經喊咗出嚟，因為真係好奇妙好感恩，呢個女兒好得意，佢都算好乖，所以好感謝上帝畀咁好嘅囡我，我好珍惜錫晒佢。」
Jade分享咗一家三口去沙灘嘅相畀《蘋果》讀者，着比堅尼嘅心心肥嘟嘟晒肚腩仔，食住手指仔個樣好可愛，Jade表示：「呢度好熱呀，諗住帶佢去沙灘，但曬得滯，根本落唔到海，惟有喺泳池同佢玩啦。」
囡囡1歲生日，關心妍同老公帶咗佢去沖繩慶祝。
仲開咗個迷你party。
囡囡Jovia仲着咗件三點式泳衣，cute爆。
2017年7月23日 明周娛樂 關心妍替女兒拍寫真 「友誼小姐」招呼歌迷
自從誕下女兒楊榮心後，關心妍Jade全心湊女，本月二十三日便是心心一歲生日，Jade和老公楊長智一家三口到沖繩慶祝女兒第一個生日。
已有差不多兩年沒有錄新歌的Jade，趁出發時與歌迷小聚會，Jade的生日跟女兒只相差數天，歌迷為兩母女一起慶祝，只有一歲的心心，剪了冬菇頭亮相，皮膚白皙十足公仔一樣，非常可愛。
每年生日都會跟歌迷見面的Jade，自懷孕到心心出世，都未有再辦歌迷聚會，本月心心剛好一歲，Jade決定帶女兒跟歌迷見面。五十位歌迷一早就到場佈置，見到Jade抱住心心進來，大家都十分驚喜，見到很多哥哥姐姐，心心一臉茫然，Jade抱住心心和歌迷逐一say hello，Jade說：「差不多有兩年沒有見歌迷了，他們很多都未見過心心，今次就帶她讓大家見面，心心好似『友誼小姐』滿場飛，一直都很冷靜，直到切蛋糕，可能被大家的拍手聲嚇親，心心就喊了幾聲，不過面對五六十人，心心的表現算幾叻了。」
心心幫忙揀歌
在場歌迷，很多都是跟住Jade出道，十多年感情，大家就好像朋友，Jade亦不時在網上跟歌迷update近況，大家知道Jade做了媽媽後，放了不少時間在家庭，尤其是專注湊女兒，都沒有催Jade出新歌，但今次見到心心開始長大，大家開始有「牢騷」，Jade說：「其實一直都有音樂人寄demo給我，有時在屋企和心心一起聽，她對音樂很敏感，我會問她『這首好唔好？』但她每一首都笑笑口，哈哈！」有歌迷拿出Jade出道時推出過的卡式帶，Jade一見就喊，「嘩！真的很感動，其實大部分歌迷都是由出道認識，到我結婚、生BB，大家見證大家的成長，我都估不到自己會喊，最感動是他們找到我出過的卡式帶，是頭幾張專輯推出的，我自己都沒有，真的好珍惜。」
心心第一個生日，Jade和老公早在幾個月前已計劃要到沖繩慶祝，讓心心感受一下陽光海灘，始終第一次帶女兒旅行，Jade都做足準備，反而自己的行裝就非常簡單，出發前更幫心心買了幾套小泳衣，Jade說：「心態真的不同了，以前叫老公幫我影相，現在我們做了攝影師，整個電話裏都是心心的寫真。」
■ 撰文：劉家倫 部分圖片來源：關心妍facebook
歌迷準備了Jade鍾意的Melody蛋糕，和一個母女造型蛋糕，被眾人圍住的心心，初時還表現冷靜，後來被掌聲嚇親。
兩年沒有見歌迷，聚會有一半時間都是拍照，Jade當然不會介意，這邊Jade影相、那邊有人抱住心心做「佈景板」，滿足歌迷。
一家三口出發到沖繩慶祝，期待穿水著的心心寫真呢！
