撰文：秦志鴻
開心時會笑，傷心時會哭，此乃人之常情。記得日劇《女王的教室》中的一句對白：「心情低落的時候，即使是強顏歡笑，也能讓心情漸漸轉好。」但其實大家又可有想過，這種在傷心時刻意去違反心情和狀態的去試圖令自己開心的行為和舉動，只是一種逃避面對傷心的途徑？倒頭來，只是在畫花的白紙上塗抹白彩後繼續寫字，重覆不斷。
2004年，關心妍出道兩年就走入事業低潮。（葉志明攝）
「情緒抑鬱唔等人，只要一唔留神，佢就可能會離開，呢個係好恐怖，就咁就奪取咗一個人嘅生命，靈魂。」
關心妍（Jade）於2002年出道，主打悲情歌的她利用短短兩年時間橫掃各大樂壇頒獎典禮，再登上紅館開演唱會走上事業巔峰。但在2004年，阿Jade的歌唱事業受到阻滯，更一度令她感到無比的挫敗：「我覺得嗰陣時係我事業嘅谷底，無工開，咩都無晒，我諗無嘢慘得過係咁，嗰個moment係失業，一個歌手失業，你諗吓係會點呢？所以我好明有啲人嘅經歷，某程度上我都明白，因為我都經歷過，有時過來人先知道嗰個無助，知道自己無能，覺得自己無可奈何嗰種感覺。」
關心妍的教室雖然很小，但音樂所及心靈之境郤是無限大。（葉志明攝）
成立慈善基金、開辦音樂治療學 鼓勵年青人擺脫情緒病
經過約兩年的事業低潮，阿Jade再次在樂壇重新出發，憑住其唱歌的實力，攀上各大頒獎典禮勇奪多個獎項，例如在2007年在無綫舉辦的《十大勁歌金曲頒獎禮》上獲頒「年度傑出表現銀獎」、2010及2012年的「新城勁爆頒獎禮-新城勁爆女歌手」獎等等。在事業上取得優異成績的她亦不忘積極參與慈善，近年還開展慈善事業，成立「妍亮生命慈善基金」幫助抑鬱症人士及邊青學生，於2017年年底舉辦過大型慈善晚宴，當晚籌得的善款成為了今天阿Jade開辦音樂治療學院「Shining Life Music」的資金：「其實一路都做義務工作十幾年，前幾年成立咗妍亮生命基金，我哋嘅範疇都係去啲學校去禁毒、去鼓勵年青人。但呢幾年我發現個社會有啲轉變，人嘅心靈，情緒有啲問題，點解會有咁多人有情緒病、抑鬱嘅？咁我就喺度諗要做一個地方令到佢哋有治療呢？例如唱歌嘅時候，你聽完我唱歌，可能會感動，會喊，唱出個心聲可能你會釋懷，咁我就決心開展一個地方畀我做音樂治療，亦機緣巧合之下遇到兩位專業音樂治療師。」
關心妍曾經試過假堅強，但其實只是自欺欺人，強裝開心只因未能釋懷（葉志明攝）
切忌假堅強，以音樂作為媒體去抒發心中鬱結
「情緒抑鬱唔等人，只要一唔留神，佢就可能會離開，呢個係好恐怖，就咁就奪取咗一個人嘅生命，靈魂」阿Jade說：「千祈唔好裝作堅強，明明自己好傷心，但一味淨係聽啲勵志歌，但其實你嗰刻係未勵志到。唔可以喺唔啱嘅moment做唔啱嘅嘢。自己都試過假堅強，因為以前唔識，以為自己搞得掂，呃咗自己。」阿Jade認為情緒病的癥結，某程度上是人們找不到途徑去抒發，而她相信，合適的音樂絕對是其中一個抒發的途徑。故此，阿Jade成立了「Shining Life Music」，希望從音樂途徑去紓解抑鬱情緒。
關心妍當年因「關家姐」潮文令形象大損，走進事業谷底（葉志明攝）
生命中的小確幸－夫妻二人拍住上
今次成立音樂治療中心，由籌備到正式開幕花了不足一年時間。能夠在短時間內完成，阿Jade直言非常感恩：「我咁大個女未投入過唱歌以外嘅嘢，今次由搵地方、租金、燈油火蠟全部都係錢。不過好好彩，我搵到一個租金相宜嘅地方，樂器又有贊助，（總數花了多少錢？）六位數字啫。（老公有幫手？）佢係我嘅得力助手，因為而家慈善基金只係得我哋兩個人，行政上面就交畀佢，我就負責落手落腳去搞。今次算係另外一個夢想成真，當見到自己有一個office，而唔再係返到唱片公司，個滿足感好大。」
關心妍未有放棄音樂夢，同樣是希望借助音樂的力量去感動、感染別人（葉志明攝）
在女兒身上找到快樂泉源
阿Jade自認是一個慢熱的人，所以如今要擔任老師面對群眾教導唱歌，對她而言確實是一項重大挑戰：「（學生）一嚟到我就要好open up，呢啲係我哋平時做歌手未必會咁open，但而家我要將自己嘅性格改變。」但慶幸她在過去的兩年與女兒Jovia朝夕相對，更從女兒身上找到快樂的泉源：「可能係因為我呢兩年同女女去嗰啲play group，我個人都開心咗好多，成日同啲小朋友喺埋一齊，唱好多兒歌，成個人都會孩子氣咗，後生咗，美容都做少咗。始終同小朋友相處係要用十倍力，要習慣好hyper，我覺得係一個做老師嘅預備。」
