人妻關心妍（Jade）今日喺商台宣傳新歌《人生銀行》，佢話首歌係總結自己咁多年失戀嘅情歌，仲搵咗黃偉文（Wyman）寫詞，係講大家要忘記以前傷痛，唔好掛住以前，要放低，佢話：「首歌有句歌詞話上半生不太順暢，以前我嘅愛情，都好痛苦好傻，0依家就搵到自己老公。」
Jade話以前啱啱做歌手時，試過差啲為情自殺，然後先諗自己人生意義，佢話：「嗰時讀大學，咩都以男友為主，同呢個男仔糾纏好多年，但如果我決定要做歌手，就要抉擇同唔同佢一齊，因為佢係20幾歲就要結婚，之後我決定搵自己夢想 。」
Jade話中途見舊男友結婚生仔，自己仲係單身，有時都會後悔會唔會揀錯，但原來自己最好嘅喺未來啫。Jade話下月係同老公拍拖同結婚周年，結婚已6周年，會自製禮物送畀老公，不過咁啱撞正下月底澳門演唱會，可能要之後先慶祝，佢話：「老公話冇乜所謂，佢都話做嘢緊要啲，其實近年我會叫老公唔使送禮物比我，將錢捐去我嘅慈善基金仲好。 」
關心妍到電台谷新歌《人生銀行》。