關心妍噚晚喺尖沙嘴浸信會出席「生命反思大會」分享會，佢話創世電視搵咗一個機構，拍攝俾伊斯蘭國(IS)傷害嘅人嘅生活，有個地方叫雅茲迪，嗰度有好多小朋友俾IS捉咗去，包括7歲嘅小朋友已經被強姦同殺害，所以有關機構希望盡量拯救，有啲小朋友逃走唔到而放棄就會死，呢啲事真係天地不容。」
而關心妍就為呢個節目唱咗一首歌《像我這樣的一個雅茲迪女子》，佢話：「唱時好心痛，個地方咁遠，自己唔知可以做乜，希望大家多啲認識呢啲事，歌詞真係好觸動，諗起每宗個案心痛，唱唱吓都喊咗出嚟，好多小朋友被強姦無數次，呢啲事好殘忍，完全唔相信會發生喺不足10歲嘅小朋友身上，希望為佢哋發聲，令大家關注。」佢認為做人做事都唔應該以牙還牙，應該以愛還愛。
雖然世界好亂，但關心妍話唔會因為咁而唔生小朋友，佢話：「好彩我有信仰支持，或者生出嚟會好驚，但希望BB將來可以幫到世界，做和平嘅事，推動啲好事，唔使叻，但希望可以幫到人。」不過佢暫時都未成功造人，佢笑話：「希望快啲啦!生猴仔好呀，已經不停試，希望今年成功，農歷新年我會放個大假，o依家淨係唱歌都唔算忙，造人一定有時間。」
