關心妍（Jade）今日喺荔枝角接受RoadShow紅人館訪問，懷孕近6個月嘅Jade，表示呢幾日個肚大咗好多，突然倍升，覺得好論盡，每朝6點就會被BB踢醒。知道仔定女？Jade稱要等清明節假期之後，先可以照。覺得係仔定女？佢話：「點都話係女，希望講中啦，因為好恨生女。」
由於個胎大得好快，所以Jade指條腰成日都好攰，不過唔使帶腰封；雖然暫時未有肚紋，但佢已經不時搽cream，佢話：「要忍手唔好『R』，0依家係另一種辛苦。」
問佢係咪買咗BB用品？Jade話：「買咗床仔，因為去甲醛都要3個幾月，所以買得嚟都差唔多，但因為未知BB嘅性別，所以其他嘢、衫褲鞋襪都未買。」Jade仲話佢老公好鍾意女，講笑咁話如果佢今胎生仔就唔會多理。老爺奶奶想唔想要個孫仔？佢稱：「有個孫已經好開心，因為等咗咁多年，所以都唔理性別。」
提到劉德華老婆朱麗倩成功接受人工受孕，問Jade有冇試過？佢講：「有考慮過，但我仲有時間，如果40歲前都冇，就有呢個打算，不過好幸運地，演唱會之後就有咗，其實最重要都係要調理好身體，身體唔好做乜都好難。」
