36歲嘅關家姐關心妍，同老公楊長智結婚7年，很想當媽媽嘅關家姐，今年終於得償所願，2月嗰時喺微博到公開懷孕喜訊，o依家已經懷孕5個多月，預產期仲同媽媽生日差唔多日子，即係大約今年7月尾。喜得猴B嘅關家姐，都未有停工，之前就為新歌《空心人》，去到老遠嘅屯門拍攝MV。今日關家姐又出動喇，但就唔係開工，係為個BB添置家品呢！
噚日下午5時許，記者發現關家姐老公楊長智獨自一人喺銅鑼灣買嘢，見佢手拎住一大袋食物，佢就好Man咁將啲食物放晒上車，但佢就未有離開銅鑼灣。跟住佢就去到一間家品連鎖店！哦！原來關家姐已經喺裏面掃緊貨喇！
腹大便便嘅關家姐，唔知係唔想人認得佢吖，定係擔心人多地方，容易受到傳染，全程戴上口罩。楊長智入到家品店後，即刻去搵老婆，仲幫佢拎住一籃戰利品，而關家姐就拎住張較輕嘅地毯。但佢哋都好似未買夠，再去睇籐籃、銀器擺設。
一個小時後，關家姐終於買完心頭好，埋單要2千幾蚊，俾錢當然係由楊生負責啦！埋單後，兩公婆就好Sweet咁，一齊行去攞車，上車後，關家姐就即刻除口罩，吸下新鮮空氣。
攝影：羅德光、梁繼光、黃曉程
腹大便便嘅關家姐，好細心咁挑選家品。
關家姐全程繞實老公楊長智。
關家姐蒙住面掃貨。
買得心頭好，兩公婆好Sweet咁行去攞車。
楊長智好細心咁扶關家姐上車。
今年二月，關家姐喺微博公佈懷有猴B。
關家姐早前仲為新歌到屯門拍攝MV。