36歲的關心妍（Jade）因為突如其來的驚喜打亂晒時間表，挺住5個月巨肚的她堅持要做埋新歌《空心人》宣傳先可以閉關安胎。日前做完嘢的Jade去中環做產檢，雖然由落車到上診所只係幾分鐘路程，但由於人來人往，老公楊長智變緊張大師全程拖到實，有個廿四孝老公貼身照顧，Jade好幸福。
上周Jade去中環睇醫生時，老公唔想老婆咁辛苦兜路行，選擇在診所附近位置的雙黃線落車，Jade上落車老公都好細心咁扶到實。而改穿平底Boots，手挽名牌手袋的Jade雖然冇戴口罩，但手提空氣清新機不離身，用嚟淨化空氣預防流感。沿途兩公婆有講有笑，呢個小生命帶畀兩公婆無限喜悅。
最近流感肆虐，Jade頻頻外出開工就中過招，她說：「我咳到扯住個肚皮，好彩醫生話媽咪咳係唔會影響到個胎，不過可能BB嫌我好嘈，咳親都會起腳踢我，好搞笑。依家唔使開工就盡量留喺屋企，老公外出回家都會立即沖涼同消毒，平日會帶埋部空氣清新機出街，呢部機其實唔貴，不過要配合有殺菌作用嘅香薰。」
今次產檢報告話BB好健康仲比正常Size略大，預產期7月的她興奮自爆：「我唔會揀同佢同一日生日（7月31日），長遠去諗佢第時要同老公、男友慶祝生日嘛！」言下之意咪生B女？她即笑住補鑊：「係因為我鍾意囡囡，希望諗得多會成事啫，我仲等緊驗血報告呀。」
