歌手關心妍（Jade）同囡囡楊榮心嘅生日好接近，早前先一家三口飛咗去日本沖繩慶祝囡囡一歲生日，盡興而回之後，尋日就輪到Jade 38歲正日生日，獲一班好友為佢舉行生日派對慶祝，當中包括歌手鄭欣宜、許廷鏗、胡鴻鈞、陳慧敏等，非常熱鬧。
現場布置咗多個彩色氣球，加上壽星女Jade着上淺藍色裙，感覺非常青春，網民大讚佢凍齡唔識老之餘，望落仲後生咗！關心妍肉緊抱住囡囡，仲齊齊向鏡頭送上飛吻，難任俘虜一眾網民嘅心！Jade同老公楊長智結婚以嚟恩愛非常，向來係愛妻號嘅楊長智向Jade送上「肉嘴」冧老婆，仲有兩個大蛋糕，相信Jade今年嘅生日必定好難忘！
生日真難忘！
左起：胡鴻鈞、欣宜、楊榮心、陳慧敏、關心妍
睇嚟都好大班人賀Jade（左二）生日啵。
欣宜（左）都忍唔住要錫錫榮心。
有老公攬到實，呢個生日夠完美。
仲有老公送肉嘴，So Sweet～～
囡囡榮心就黐實媽咪。
兩母囡對望，真係心都融化。
送飛吻！