關心妍（Jade）早前為慶祝自己38歲和女兒楊榮心(Jovia)的1歲生日，與老公楊長智及老爺奶奶到沖繩旅遊。一家人享受陽光與海灘，又歎沖繩料理。原本女兒第一次去旅行好開心，但始終年紀太細，Jade表示坐車去景點時，女兒坐得太耐會唔耐煩，搭回程機返港時她最辛苦，為安撫女兒，她幾乎抱女兒企足兩個半鐘，她坦言落機時有少少暈暈哋的感覺，所以下次要等Jovia再大啲、學識坐定先再去。
Jade兩年前去沖繩參加朋友婚禮時，覺得當地風景優美，又可以食日本菜，所以今次成家人一齊去。女兒Jovia第一次去旅行，最初都覺得幾新鮮，見到啲花花草草又開心。由於是自駕遊，老公負責駕車，她就負責照顧女兒，但每次上車她均感壓力大，「因為由一個地方去另一個地方，車程最少都要40分鐘，我要湊住個女，令佢坐定定，所以帶定好多嘢畀佢。」雖然有傭人姐姐同行，但Jade表示女兒太黐她，有冇帶姐姐都分別不大。
由於當地陽光太猛烈，最初他們都有帶女兒去海灘玩沙同踢水，但之後決定留在Villa，「帶囡囡周圍行吓，同喺泳池游水，好在嗰度有啲好大嘅Mall，有時日頭行完商場，夜晚先Outdoor活動吓。」而最辛苦都係回程搭飛機時，她憶述：「可能我Miss咗佢瞓晏覺嘅時間，上機冇耐佢已經唔肯坐定，所以我成程都要陪佢行嚟行去，或者抱住佢企喺度，所以落機時有啲暈暈哋。」雖然今次辛苦啲，但有個美好回憶都是值得的。
撰文：李佩儀
兩公婆分工合作湊囡囡去旅行，今次是個很好的經驗。
關心妍與老公楊長智和女兒Jovia一齊在酒店泳池游水。
女兒第一次去旅行，關心妍表示她見到花草好開心。
由於天氣太熱，關心妍日頭鍾意帶女兒行商場。
搭飛機去沖繩時，女兒好乖肯坐定定。
關心妍帶女兒行Sanrio，兩個都好Enjoy。
雖然有帶傭人姐姐同行，但關心妍凡事都親力親為。