關心妍（Jade）噚晚到九展為葉家寶有份主辦嘅歌唱比賽擔任評判，講到囡囡楊榮心o依家一歲幾，正讀緊playgroup，佢話：「心心出年要讀學前班，朋友提我先知要9月報名，所以我一定唔會係怪獸家長，只會係懵盛盛家長。」問到有咩心水學校？Jade就話：「想搵間近屋企，冇諗要搵國際學校，最好近到返學行路返去就得，附近有女校同埋有一條龍升學嘅學校，自己唔太擔心。」
Jade又話覺得小朋友學習品德比學業成績最重要：「o依家佢識Thank You，數字1至10佢遲早會識。」現正學行路嘅心心，原來已經識講嘢，但就淨係識叫爸爸：「對住我叫爸爸，我教佢叫媽媽，佢都係叫爸爸，冇辦法，仲未識叫。」
講到同Neway嘅合約，Jade坦言因為要照顧心心，已經再三延長：「仲有兩年幾，其實同Neway嘅關係一直都好好，已經唔係合唔合約。」另外，搞手之一嘅葉家寶就話今次比賽嘅勝出者，將會10月去緬甸參加決賽，屆時會同多個國家嘅選手一齊爭冠。
關心妍話囡囡已經返playgroup，明年返學前班。
佢仲話為咗湊女，份合約已經再三延長。
葉家寶離開亞視後，多方面發展，噚晚搞歌唱比賽。