38歲關心妍（Jade）有女萬事足，雖然寶貝女楊榮心（Jovia）經已15個月大，但Jade依然樂在其中享受做全職媽咪，暫無意復出幕前，不過做善事就例外。12月16日，Jade將以妍亮生命慈善基金主席身份出席《重新站起來慈善晚宴》，目標籌集資金開設輔導中心，幫戒毒成功嘅年輕人增值自己，或曾迷失過嘅邊青搵番方向，有需要的中小學生也能受益。她坦承，做了媽咪後更加大愛：「以前我點會厚住面皮叫人捐錢、捐物資呀，但o依家覺得出小小力能夠幫到人，阻止到悲劇發生係好事，現今社會最需要係愛。
妍亮生命慈善基金成立了3年，主要幫助邊青，帶出正能量給中小學生，分享燃亮生命訊息等。今次關心妍為求達到開設輔導中心目標出錢又出力，除私下捐出6位數字外，由發起到尋找「老闆」、搵人買枱及聯絡贊助商，全部親力親為都幾吃力：「講錢就失感情，我逐個去敲門，係一次好好嘅體驗，好彩都好多朋友支持我，如贊助紅酒、鑽石、名牌包包，到時可以拍賣，我好感動。」
成立輔導中心後，日、夜時段可以支援到不同的人，構思中早上時段為有需要的學生及年輕人做音樂治療，從唱歌及音樂紓緩情緒，從而減少學生輕生的不幸，她不排除會做埋兼職導師，笑言囡囡有亮眼及飛吻最冧到人，可以做埋小義工。
教女品行最重要
因為湊女忙到不得了，關心妍短時間不會復出，幸得公司體諒及配合，她強調：「我唔會係怪獸家長，o依家主要教佢品行同禮貌，有時佢扭眼瞓唔願瞓我會陪佢罰企，企到佢攰咪乖乖瞓覺，而且我哋全家人喺佢面前係唔會玩手機，要教佢識得同人分享。」
採訪：方騫平
化妝：Cyrus Lee 髮型：Angus Leung @ hip Hair culture 場地：CEO
關心妍隔日陪女返playgroup，陪食陪玩，感覺上自己都好似返回學生時代。
Jade跟梁詠琪好啱傾，兩個索媽不時交流湊女心得。
雖然做咗媽咪，但關心妍同樣愛錫4歲大愛犬Butter，尊重生命絕對係最好嘅身教。
囡囡係關心妍嘅心肝，所以順其自然唔急於追仔。
關心妍享受湊女，短期內都唔會喺台上唱歌。
關心妍為同囡囡慶祝一歲生日，一家人去沖繩旅行慶祝。