關心妍(Jade)今朝以大使身份出席山頂明德醫院「枱轎比賽」活動，仲同比賽嘅健兒打氣。Jade話第一次做呢個慈善活動大使，覺得好有意思，仲話今次自己嘅「妍亮生命慈善基金」係受惠機構，所以一定要支持。Jade平時鍾意自己湊女唔假手於人，不過今日因為太早，囡囡都仲未起身，加上有工作在身，所以就交囡囡畀老公照顧。
Jade最近忙緊自己嘅慈善基金同「全康澄心」合作喺年底搞嘅大型籌款晚會，努力搵人買枱，佢話：「今次會有5、60圍，o依家賣咗一半左右，得番一個月時間，希望可以賣得晒，都有啲吃力。因為今次目標係開服務中心，大約要300至400萬，夠2年營運，希望可以跑埋佢。」而Jade就話好多圈內朋友都有幫忙，碌咗唔少人情卡，佢話：「真係仲難過開演唱會好多，演唱會只係請嘉賓，唔使碌啲錢返嚟。其實我好耐都冇接嘢做，下個月就接咗兩個大陸騷，感恩想做番嘢嘅時候就有，萬一唔夠都可以跑番條數。」為咗「跑數」復出？Jade話：「冇辦法啦！真係想幫到有需要嘅人，有情緒病嘅人可能會係潛藏咗，只係冇理冇去醫，我有個朋友就係喺完全冇先兆下跳樓，係得人驚嘅事，所以要多啲關心身邊嘅人。」
關心妍話下月搞嘅慈善晚宴，要碌好多人情卡。
關心妍今朝出席活動，囡囡都未起身，唯有將佢交俾老公照顧。
