Author Archives: Admin

等足七年，快將37歲的「關家姐」 關心妍 （Jade）終於一索得猴B，預產期七月！2009年，Jade下嫁金融才俊楊長智，對於生B一事，有感大家依舊年輕，未急於全力造人。一年一年過去，到33歲開始認真計劃，期間有停工休息，希望在無壓力下造人，但換來多次詐糊。兩夫婦曾互相質疑過，再扶持，尋遍坊間的求子秘方，甚至考慮人工受孕，若果都不行的話，或需領養小孩，希望最終有一個完整的家庭。

去年，Jade覺得要試任何懷孕方法前，必先養好身子，她開始每晚浸腳、戒凍飲等，令身體和子宮變得溫暖。去年底終於有好消息，Jade自然懷孕成功，她笑言得知有孕的一刻，如果可以跳的話，真是開心到跳起！

2009年Jade與楊長智結婚，七年後才懷上第一個B。

七年求子之路

「我又唔係好高齡，點解咁困難嘅？」Jade這七年間也不禁質問，她一早知道「有仔趁嫩生」，婚後一直有造人，只是頭兩年未好恨生B，抱着嘗試的心態去造，「冇就唔緊要啦，再等吓先囉，第一我哋仲後生，第二又唔急嘅。」兩年後完成紅館演唱會，休息期間又試，「都係冇，可能未得啦，都唔緊張嘅。」

33、34、35歲了，兩人開始認真就此問題思考，因為35歲開始踏入高齡產婦階段，「距離40歲得番幾年，真係要認真啲喇喎，唔可以有就有，冇就冇，因為我哋兩個都想有小朋友。」她坦言，傳媒就此問題問足七年，問到她也質疑自己，「究竟我係咪真係咁想要呢？」

她確認了自己真的渴望有小孩，2013年全面停工，有說她要退出樂壇，其實她希望找個空間讓自己喘息，做回幸福人妻，努力組織家庭。她與老公飛到自己讀書之地加拿大休息，放鬆心情去造人，以為今鋪實中，豈料試足一年卻失望而回。

Jade身邊已有很多朋友介紹學校，她有一一接收，但明白去面試的始終是小朋友，入哪一間學校冥冥中自有安排，「所以父母都冇得咁緊張，同埋學識唔係人生最重要，應該睇佢資質去揀學校。」

宣布懷孕後Jade鬆一口氣，之前為守秘密頂硬上工作。

屢食詐糊心情跌谷底

是否自己身體出問題？她尋遍中西醫求子，所有秘方、食療也一一試盡，「坊間你講得出嘅我都試過，食過好多詐糊，慢慢我哋變得沮喪，我相信所有想要小朋友但不果嘅夫婦都會明白，點解咁嘅？想要小朋友嘅時候，可以難到咁嘅？真係好難呀，難到你都唔相信，有冇咁難呀？」

這條漫長的求子之路，他們靠信仰去撐起心情，不斷祈禱「神，祢俾我哋啦。」這段路更是兩人感情的重大考驗，是你還是我的問題呢？是我的身體有事？再沒有的話是否要領養呢？這堆問題一直充斥她的腦海，常言道想懷孕要抱着輕鬆心情，但她根本不能放鬆，太多問題、太多壓力。「個心一直都會想試，我哋已經冇放唔放鬆嘅地步，唔知咩叫放鬆。好多人叫我哋放鬆啲去旅行啦，唔係咁簡單㗎。」

Jade去年為演唱會努力減磅，豈料在身形勁瘦下懷孕，如今磅數回升也不覺得肥胖。

終於有孕：開心到想跳起

甚麼方法也試盡，兩人灰心到不知如何是好，多年來連環食詐糊，去年底驗到有孕時，兩人都不敢相信，以為又食詐糊，Jade說：「唔好俾大家太大希望，費事又失望，但心情好掙扎，戰戰兢兢，要等一個月去睇醫生確認。去到照超聲波，見到真係有嘢嗰一刻，嘩！好似人哋中咗頭獎咁！唔係呀嘛？真㗎？真係開心到……啲人話會開心到喊，點止喊呀？簡直開心到如果可以跳，我哋開心到想跳起！真係唔敢相信呀！」

去年確定懷孕前，Jade反而沒有刻意做過甚麼，10月還到過澳門開演唱會，體重只剩98磅，在演唱會前後只有象徵式試一試，之後聖誕檔期又有排山倒海的工作，完全沒有任何期望。期望愈大，失望愈大；沒有期望，卻有驚喜。「依家諗番，可能只係timing問題，我依家36歲，七月生嘅時候已經37歲，我真係冇諗過會搞足七年。」

Jade怕去人多地方，早前破例去看陳慧嫻演唱會，笑到見牙唔見眼，BB更不停踢好興奮！

一班歌手包括欣宜、林欣彤、許廷鏗及胡鴻鈞等相約Jade飯敍，祝賀她生個肥肥白白靚B。

暖腳有助暖子宮

Jade的經歷，令一班恨生B卻苦無結果的夫婦，重燃希望，她以過來人身份向求子的女士分享道，女人必須要養好身子，「以前我冇咁乖，試過飲中藥唔得就算，咁我冇可能長期用中藥調理，一路調理一路都冇係好沮喪㗎嘛。後來我試吓天然食療，戒凍飲、多飲紅棗水，又從日常生活改變吓習慣，開始做一啲暖子宮嘅嘢。」

腳部是人體的「第二個心臟」，中醫亦有云：百病始於足，故女人的腳部護理十分重要，好好溫暖雙腳能有效促進血液循環、促進睡眠，更有助溫暖子宮，於是Jade每晚臨睡前浸腳，在家也着襪，長期保持腳部溫暖。「女人對腳好緊要，寒氣、濕氣都喺對腳吸上去，好多人返到屋企就除晒鞋襪，好舒服呀，或者覺得熱呀，原來唔着拖鞋係唔好，仲應該要着襪，我好乖每晚臨瞓都浸熱對腳，我相信或多或少都有幫助。其實任何方法都一定要身體好，就算做試管都要睇自己捱唔捱到，成功令受精卵着床。」

Jade懷孕五個月後肚子急速變大，頭幾個月覺得身體輕盈，五個月開始瞓覺會覺得扯住。

●撰文：Ling
●攝影：Clay Lam （部分相片由受訪者提供）