2012年8月25日 太陽報 關心妍「天后」遙望 這麼近那麼遠

做得歌手，有誰不想像陳奕迅和容祖兒般，做個呼風喚雨的天王天后呢？關心妍甫入行就為做天后而扭盡六壬，但就只差一站，列車終究停留在銅鑼灣，而名利卻令她幾乎萬箭穿心，驀然回首，關心妍怕了做天后，下一站是哪裏都冇所謂，但千萬不要是「天后」！

滯留銅鑼灣

若關心妍（Jade）當年成為了天后，敢寫包單她必不會嫁得那麼快，世事往往就是這麼弔詭，有得必有失，但失去之後可能得到更多。都說世上最遙遠的距離就是只差一步，Jade就是差一步未能由銅鑼灣前往下一個站（天后），為甚麼？她曾苦苦思索卻仍是想不到原委。

遙想當初入行，Jade早已有一個不成天后便成仁的想法，卻令她心靈累透：「以前做新人真係好想做到成績，上到天后嘅位置，等於每個人都希望仔女考A，冇人想Keep住攞B同C，但我不斷朝住呢個方向進發時，原來係好痛苦同好迷失o架！我唔係為咗音樂去做音樂，而係為咗做天后而去做音樂。」

人有時總會利欲熏心，就是「天后」這個目標令Jade一直往下沉：「當時我朝住呢個方向去計算好多嘢，犧牲好多，冇咗時間，仲要冇晒人生，淨係做做做做做，但又唔保證你會做到。其實好多人都係爭嗰步，但嗰步真係要睇天時地利同人和，要好有運氣同埋成件事要好配合，你先可以去到嗰步！」

樂做悲情歌后

Jade深知樂壇天后「罕見」，付出多少都是沒自己的份兒：「天后永遠都係得嗰一兩個，失落嘅就有好多個，個個都想做，有邊個唔想考頭三名o架！但係咪真係只為呢個Point去做音樂呢？做唔到係咪代表我唔係一個好歌手呢？係咪代表我唔值得人欣賞、冇晒價值呢？後尾慢慢喺信仰度搵番自己，原來人並非只為追尋名利，名利係吸引，但未必係令自己最快樂嘅事，做天后可能令你好快樂，但背後卻一殼眼淚。依家我更開心可以做到我鍾意嘅嘢，我嘅歌可以幫人治療失戀，唔係死撐，但當你到呢一刻仲去唔到又點呢？再困喺死胡同都係冇用，就等於失戀，痛苦嘅係你自己。」

誠然，當年以為天后唾手可得，但差一步卻成了糖衣毒藥，甚至令Jade患有情緒病：「真係有崩潰過，2004年開完演唱會，順理成章又近咗『天后』一步，但冇諗過開完之後會有咁多負面聲音，排山倒海咁逼近我，明明兩晚嘅紅館演唱會至少有兩萬人支持我，點解可以一晚冇晒？好唔開心，真係瞓唔着，更一度患上情緒病，唔想見人。後來因為信仰而開始諗通，要撐番起，要搵番當初做歌手嘅目標，依家你問我就算做唔成天后，仲願唔願意做音樂？我會答你做，因為我有我做音樂嘅意義！」

音樂是世界語言，Jade在這裏找到滿足感，不為做天后，更非為車與樓，而是為打開別人心扉：「有Fans同我講失戀好崩潰，乜嘢方法都試過但都治療唔到，直到佢睇我演唱會，我分享自己嘅經歷，又夾雜啲失戀歌，我話放過佢就等於放過自己，嗰刻真係好奇妙，佢真係願意放手，原來人哋最想要嘅就係你唱呢啲歌，我嘅歌聲係有治療安慰嘅作用，我知佢肯放棄都好感動，可以救一個人出火海，失戀真係好慘好痛！」

深知市場定位

說實話，除了慘情歌，Jade決不能唱別的歌，無他，因為慘情歌最適合她：「一路唱慘情歌，其實真係要轉吓歌路，人哋睇我演唱會都係鍾意聽我唱慘情歌，見過有人喺台下喊，原來失戀聽我嘅歌係會醒o架，我知個市場需要我啲咩，一轉歌路就會出事，與其係咁，不如就做個失戀達人啦，其實我都一樣由相戀到失戀再相戀先到結婚，原來唔失過戀係唔知咩叫做幸福。」

對於音樂理念，Jade說：「頭嗰幾年當然穩陣唱Pop，之後當然想尋突破先唱Jazz，跟住轉Rock，係新鮮，但完全叫好唔叫座，Support唔到我繼續做音樂，轉變唔係一隻歌去變，係要成隻碟玩另外嘅音樂，又過幾年，發覺最適合自己同人哋最受落嘅係失戀嘅情歌，每次畀歌人哋填詞，佢哋唔慘嘅歌詞都唔填畀我，喺人哋眼中，我就係一個咁嘅歌手，一開聲就係悲，唱幸福歌要錄5、6個鐘，但悲歌2個鐘就錄好，原來我好難唱到啲Sweet歌！我唱Rock歌真係賣唔到錢，出去登台冇人叫我唱呢啲歌，做任何騷都叫我唱慘情歌，要生存就要係咁，如果我可以自資去玩，咁就唔同，做乜都得，但真係錢要行先囉！」其實Jade賺不到錢又如何？有老公養嘛，生個肥肥白白的寶寶玩好過啦！

後記：人有相似

眼中的Jade是個長情的人，助手阿小已跟隨她多年，與她歷盡幾許風雨！Jade喜歡我們的英俊攝影師，要求找他拍攝今次專訪，實是美事一則。弔詭的是訪問完畢後來個大合照，竟發現阿小跟英俊攝影師眉宇間有八分相似，小記還未跟Jade說起，她已跟我說：「好似呀佢哋，所以我鍾意佢哋幫我手囉！」

專案組

http://the-sun.on.cc/cnt/entertainment/20120825/00470_055.html